التهاب الاذن الوسطى

السلام عليكم ورحمة الله وبركاته

بنسمع كتير اوى عن التهاب الاذن الوسطى وخاصة عند الاطفال هنحاول نلقى الضوء على اهم النقاط اللى تهم اى اب وام عشان اولادهم خاصة وان المرض منتشر عند الاطفال

والتهاب الاذن منتشر جدا فى الاطفال خاصة من سن 3 سنوات

بببساطة كده نفهم تركيب الاذن فى الاذن الخارجية وبعدين طبلة الاذن اللى هى مسؤلة عن السمع وبعدين الاذن الوسطى وبعدين الاذن الداخلية

المشكلة بتحصل فى الطبقة الوسطى اللى هى بعد الطبلة

وفيه نوعين:

اول نوع الالتهاب الحاد: وده بيبقى المه شديد جدااا وبيبقى غشاء الاذن متورم وينتهى بعد الالتهاب لما يروح

النوع التانى الالتهاب اللى معاه نزول صديد وسائل وده بيفضل فى الاذن حتى بعد الالتهاب لما ينتهى


ازاى بيحصل التهاب الاذن الوسطى؟؟

ده بيحصل لما فيروس او بكتيريا بتوصل للاذن وغالبا بعد ازمات البرد الشديدة

واللى بيخليه ينتشر فى الاطفال ان مقاومتهم اضعف من الكبار عشان كده فيروس البرد ممكن يوصل للاذن ويسبب التهاب

كمان تركيب الاذن عند الاطفال بيجعلهم اكثر عرضة للاصابة ( مسالة خاصة بالتشريح وتركيب الاذن )


هل التهاب الاذن ممكن ياثر على السمع عند الاطفال؟؟

طبعا بياثر على السمع وممكن يحصل فقدان للسمع بس بشكل مؤقت حتى يتم العلاج

بشرح مبسط ان الصوت بيعدى على الاذن الوسطى عشان يتنقل للاذن الداخلية وبعدين للمخ وبالتالى وجود التهاب وصديد داخل الاذن الوسطى هيخلى من الصعب انتقال الصوت


ازاى اعرف ان ابنى عنده التهاب الاذن الوسطى؟؟

طبعا لو الطفل لسه بيبى ومبيتكلمش مش هيقدر يقول ان ودنه بتوجعه عشان كده خدوا بالكم من العلامات دى :

1- الطفل بيمسك ودنه كتير وكانه بيهرش فيها

2- الطفل بيعيط اووى زيادة عن اللزوم

3- ممكن يبقى فيه سائل خارج من الاذن

4- صعوبة فى النوم

5- ولو الطفل كبير شوية ممكن يشتكى من ودنه او تحسه مش متوازن ومش بيسمع كويس


طبعا تروحوا للدكتور فورااا


الدكتور هيعمل ايه؟؟؟

طبعا بمنظار الاذن الدكتور هيؤكد الاصابة بالتهاب الاذن ويدى مضادات حيوية وطبعا تستخدموها لحد ما العلبة تخلص حتى لو الطفل بقى كويس عشان الالتهاب ميرجعش تانى
وممكن يضيف مسكنات الم للطفل كمان

وطبعا تتابعوا مع الدكتور لحد ما يتم التاكد ان الطفل شفى تماما


بنسمع عن عمليات الاذن وممكن ان الطفل يحتاج عملية؟؟؟؟

بعد ما الالتهاب بينتهى ممكن تفضل سوائل وصديد فى الاذن وبكده ترجع تانى للطفل وكمان تاثر على سمعه وممكن على قدرته على الكلاموالحل هنا عملية لاذن الطفل وطبعا بعد استشارة طبيب متخصص انف واذن وحنجرة والتاكد ان مفيش حل غير العملية

العملية ببساطة عبارة عن فتحة صغيرة فى طبلة الاذن وبيتركب انبوبة صغيرة وخلاص على كده وبعد حوالى 4 شهور الانبوبة دى بتقع لوحدها
وغالبا الطفل بيرجع سليم تماما

ازاى احمى ابنى من خطر الاصابة بالتهاب الاذن الوسطى؟؟

هو صعب ان احنا نمنع بس اهم شئ حماية اطفالنا ضد البرد وملاحظتهم ومحاولة علاج الالتهاب فى بدايته


اتمنى يكون الموضوع افدكم