لو سمحت قول على نفسك ذكرا وليس رجلا

السلام عليكم ورحمة الله وبركاته

يمكن تستغربوا من العنوان بس فعلا لازن نفرق بين كلمة الذكر وكلمة الرجل لان مش كل ذكر يبقى رجل لان الرجولة دى معنى كبير اوى اوى وفى ناس متستحقش يتقال عليها رجالة اصلا

فى نظرى الرجولة دى قوة عطف مواقف رعاية نخوة وشجاعة مش مجرد ان عندك شنب واسمك راجل!!!!!

لان فى بعض الذكور فاكرين الرجولة يعنى صوت عالى وعملية جنسية وخلاص وكده يبقى اسمه راجل

تعالوا نشوف المواقف دى وقولوا الناس دى يستحق يتقال عليها رجالة والا لا !!!!!!!!!


1- اللى بيخون حبيبته او مراته ويحكى انه راجل ومن حقه انه يخون او يبقى له علاقات متعددة يتقال عليه راجل؟؟

2- اللى يفضل الطلاق فى بقه علطول يهدد بيها الست عشان تسمع كلامه والا هيطلقها يتقال عليه راجل؟؟

3- اللى يفترى على مراته ويضربها ويشتمها على اساس انه راجل ولازم يحكمها

4- اللى يقعد فى البيت وياخد فلوس مراته ويخليها هى تشتغل يبقى راجل برضه؟؟

5- اللى يخلى مراته تلبس مايوه عشان الناس يحسدوه على جمالها يبقى راجل؟؟

6- اللى يسمح لاصحابه يهرجوا مع مراته ويفتح لهم البيت او يستخدم مراته فى شغله عشان تزود علاقاته وتمشيله اموره يبقى راجل؟؟

7- اللى يتجوز على مراته من غير ما يستاذنها ويقولها ان كان عجبك وبسهولة يبيع العشرة يبقى راجل؟؟

8- اللى يمشى يعاكس فى بنات الناس ويعمل معاهم علاقات وفى الاخر يقلبهم ويقولهم انا مش بتاع جواز وفى الاخر يقول انا راجل من حقى اعيش حياتى يبقى راجل؟؟

9- اللى يشوف بنت بتتعاكس فى الشارع او اى حد بيتعرضلها ويقول وانا مالى اخاف يحصلى حاجة يبقى راجل؟؟

10- اللى يسمح لمراته او خطيبته انها تصرف عليه وهو معندوش اى دم ويخليها حتى هى اللى تخطبه وتقدمله كل حاجة وتصرف عليه فى كل حاجة؟؟

11- اللى يسمح لمراته او خطيبته بالاختلاط تركب مع ده العربية وده يكلمها فى البيت ويقول انا واثق فى مراتى ويخلى زمايلها فى الشغل يتصلوا بيها دون اى داعى مهم له علاقة بالشغل؟؟

12- اللى يجيب اصحابه بليل عالبيت يسهر ويخلى مراته تخدم عليهم عشان مزاجه يبقى راجل؟؟

13- اللى يسمع الناس تعيب على اخلاق خطيبته او حبيبته ويقف ساكت ويروح يسالها ويشك فيها من غير ميكدب الناس ويخرسهم؟؟

14- اللى يتخلى عن حبيبته او مراته فى عز مهى محتاجاه ويسيبها ؟؟ يبقى راجل؟؟

15- اللى يخرج مع واحدة ويتسلى معاها من غير ميخاف على سمعتها ويقول انا بحبها ومقدرش مكلمهاش او مشوفهاش كل يوم يبقى راجل؟؟ لو بتحبها لازم تخاف على سمعتها؟؟

16- اللى يطلع اسرار حياته الجنسية علشان يتباهى ادام اصحابه انه راجل وناسى خالص انه بيحكى عن مراته يبقى راجل؟؟؟


نكتفى بالامثلة دى مع انها كتيرة اوى اوى وللاسف بنتعامل مع النوعيات دى

ياريت كل ذكر يراجع نفسه ويشوف هل هو فعلا يستحق انه يتقال عليه راجل!!!!!!!!!

ولو كنت من الامثلة اللى فاتت انا اسفة ابقى خليك زى ما مكتوب فى بطاقتك الشخصية انك مجرد ذكر يعنى تعبير عن النوع فقط وليس رجل بمعنى الكلمة

وفى الاخر تزعلوا من الستات اذا طلع منها جملة انت مش راجل!!!!!!!!

نشوف ارائكم واتمنى تكونوا استفدتم من الموضوع