تجربتى مع التبرع بالدم

السلام عليكم ورحمة الله وبركاته

يمكن موضوعى النهاردة يكون له اكثر من بعد بعد دينى وبعد انسانى وبعد طبى ايضا

التبرع بالدم

يا ترى كام مرة رحت اتبرعت بالدم؟؟؟

طيب يا ترى فكرت قبل كده انك تروح؟؟؟ او فعلا رحت؟؟ والا مش بتفكر انك تروح خاالص؟؟؟

طيب هنبتدى باهمية الدم والتبرع من الناحية الطبية

انا بس هقولك عارف كام واحد محتاج دم؟؟

الموضوع مش مقتصر على الحوادث لكن فى ناس مرضى السرطان وناس مريضة جداا لازم تحتاج الدم كجزء من علاجها بصفة دورية احيانا بيوصل ان الطفل يتنقله مرتين او 3 مرات دم فى الاسبوع عشان يقدر يعيش يوم كمان

يا ترى هيجيبه الدم ده منين؟؟؟ مسالتش نفسك السؤال ده؟؟

انك بعد الشر او اى حد من قرايبك ممكن يكون عنده مرض ويكون محتاج نقل الدم بشكل دورى؟؟؟

وطبعا كل العيلة اذا اتبرعت فى الاخر بنك الدم هيخلص ومش هيلاقى دم !!!!!!!!

وطبعا انا كدكتورة اؤكد ان التبرع بالدم ملوش اى مضاعفات واذا حتى له بيبقى معمول حسابها لان اللى بياخد الدم منك دكتور وفاهم بيقيس ضغطك بيشوف انك مناسب للتبرع والا لا يعنى ان شاء الله مش هتحصل اى مضاعفات

وغير كده فالدم بيتجدد بصورة دورية فى جسمك وكمان الجزء اللى بتتبرع بيه جزء صغير جداا من كمية الدم اللى بيحتويها جسمك

كمان مفيش الم ولا حقن ملوثة ولا اى شئ من الاوهام اللى بتتناقالها الناس


البعد الانسانى

اسمحوا لى انى اتكلم عن تجربتى فى اول مرة تبرع بالدم

انا كنت فى يوم يعنى ماشية طالعة من جامع وكانت عربية التبرع بالدم امام الجامع ويعنى كدافع دينى كده رحت واتبرعت وطبعا كانت تجربة رائعة جدا جدا

اولا مفيش الم ثانيا معاملة رائعة جداا ثالثا حسيت انى ساهمت فى رفع معاناة شخص

لان بعد ما اخدوا دمى وانا بنظر لكيس الدم بقول يا ترى هيروح لمين؟؟

معقول ال 10 دقايق الى انا قعدتهم واتبرعت بيهم بالدم ممكن يعطوا مريض امل فى الحياة ممكن ينقذوا شخص فى حادثة والشخص رجع حياته تانى عشان مجرد كيس دم؟؟!!!!!!

انا بحكم عملى كدكتورة بشوف معاناة المرضى ومعاناة اهلهم فى الذل لدرجة اوقات بيمشوا فى الشوارع عشان حد يتبرع لاولا دهم بالدم عشان ينقذوهم

وفعلا حسيت ان احنا لازم نبطل سلبية ونحاول نتفاعل معاهم ونقدملهم شئ فعلا بيساوى حياتهم


البعد الدينى

طبعا لما احكى الكلام ده ممكن شوية ناس تتاثر وتقول اهم شئ انا برضى الله وكمان انا بعمل خير كتير يعنى انا ممكن اتبرع بفلوس لبنك الدم بس يعنى بلاش تاخدوا الدم منى

او تقول انا بعمل خير كتير مجتش على التبرع بالدم يعنى!!!!!!!!!

احب اقولكم ان الدم سائل ليس له قيمة قيمته فقط فيه هو يعنى لو حطيت مليون جنيه واكتر فى كفة وكيس دم فى كفة

الدم اغلى واغلى واغلى لان متتصوروش اد ايه مهم لحياة ملايين واحنا عندنا كتيير اوى منه وبيتجدد كمان من تلقاء نفسه ونبخل عليه !!!!!!!

الموضوع مش موضوع خير بتعمله الموضوع موضوع انه لازم يكون واجب قومى تعمله كجزء من اهتمامك ببلدك وكجزء من انسانيتك

وبالنسبة للبعد الدينى انا هحكى عن تجربتى الشخصية

والله العظيم متعة التبرع بالدم اكبر بكتييييييييييييييييير من انى اتبرع بفلوس عارفيين ليه؟؟؟

لانى وقفت واستنيت وتحملت الحقنة وحسيت انى بوهب جزء من جسمى لله وكمان واجب قومى تجاه بلدى

واحسن شئ كمان ان الواحد لما بيعمل خير او بيتبرع بفلوس عارف مين اللى هياخدها

لكن التبرع بالدم انت مش عارف مين هيستفيد بدمك او حتى لو عرفت فانت فعلا بتقدم خدمة عظيمة لا تعادلها اى فلوس


ارجو تكون ضمايرنا صحيت وانا كنت اتمنى انى اتبرع كل شهر لكن الحد المسموح بيه بالتبرع مرتين فى السنة تقريبا

فعلا تجربة رائعة وياريت بكرة الصبح تروح تشوف اقرب بنك دم وتتبرع وفعلا هتكون قدمت خدمة عظيمة جداااا واعتبرها زكاة عن صحتك

ويارب تقبل منا صالح الاعمال وابعد عنا الرياء